ᠴᠡᠬᠡᠷ ᠬᠤᠷᠢᠭ᠎ᠠ ᠶᠢᠨ ᠶᠤᠰᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018/7/18
                                     
                                                                                    ᠳᠤᠳᠤᠳᠤᠶᠠᠭᠠᠯᠳᠤ      ᠴᠡᠬᠡᠷ ᠬᠤᠷᠢᠭ᠎ᠠ ᠪᠤᠯᠪᠠᠰᠤ ᠮᠤᠩᠭᠤᠯᠴᠤᠳ ᠤᠨ ᠤᠯᠠᠮᠵᠢᠯᠠᠯᠳᠤ ᠠᠬᠠᠴᠢᠯᠠᠯ ᠳᠡᠬᠦᠦᠴᠢᠯᠡᠯ ᠤᠨ ᠶᠤᠰᠤ ᠵᠦᠢ᠂ ᠡᠶᠡᠯᠳᠡᠭ ᠨᠠᠶᠢᠷᠰᠠᠭ ᠵᠠᠩ ᠮᠤᠷᠠᠯ ᠪᠠ ᠬᠤᠶᠢᠴᠢ ᠦᠶ᠎ᠡ ᠪᠠᠨ ᠡᠶ᠎ᠡ ᠡᠪᠳᠡᠢ ᠪᠠᠷ ᠬᠦᠳᠦᠯᠦᠨ ᠬᠦᠮᠦᠵᠢᠬᠦᠯᠬᠦ ᠰᠤᠷᠭᠠᠨ ᠬᠦᠮᠦᠵᠢᠯ ᠲᠠᠢ ᠨᠢᠬᠳᠠ ᠬᠤᠯᠪᠤᠭ᠎ᠠ  ᠲᠠᠢ ᠶᠤᠮ᠃      ᠬᠠᠨᠭ᠍ᠬᠢᠨ ᠮᠤᠩᠭᠤᠯᠴᠤᠳ ᠡᠷᠳᠡ ᠢᠵᠠᠭᠤᠷ ᠠᠴᠠ ᠪᠠᠨ ᠢᠨᠠᠬᠰᠢ ᠴᠡᠬᠡᠷ ᠬᠤᠷᠢᠭ᠎ᠠ  ᠶᠢᠨ ᠳᠠᠯ᠎ᠠ ᠪᠠᠷ ᠰᠦᠷᠡᠬᠡᠢ ᠴᠢᠬᠤᠯᠠᠴᠢᠯᠠᠳᠠᠭ ᠠᠵᠤᠭᠤ᠃ ᠬᠦᠮᠦᠨ ᠬᠠᠷ᠎ᠠ ᠲᠠᠢ ᠬᠠᠷᠢᠯᠴᠠᠬᠤ᠂ ᠠᠶᠢᠯ ᠬᠡᠷ ᠤᠨ ᠠᠳᠠᠯ ᠶᠠᠪᠤᠳᠠᠯ ᠬᠢᠬᠦ᠂ ᠮᠠᠯ ᠤᠨᠤᠭᠠᠨ ᠳᠤ ᠤᠶᠢᠷᠠᠳᠤᠬᠤ᠂ ᠬᠤᠷᠢᠮ ᠨᠠᠶᠢᠷ᠂ ᠪᠠᠶᠠᠷ ᠴᠤᠬᠯᠠᠭᠠᠨ ᠳᠤ ᠤᠷᠤᠯᠴᠠᠬᠤ ᠵᠡᠷᠬᠡ ᠶᠢᠨ ᠠᠵᠢᠯᠯᠠᠭ᠎ᠠ ᠪᠦᠷᠢ ᠳᠤ ᠪᠦᠷᠢᠨ ᠳᠦᠬᠦᠷ ᠳᠤᠭᠳᠠᠪᠤᠷᠢᠵᠢᠬᠰᠠᠨ ᠨᠢᠬᠡᠨ ᠵᠦᠢᠯ ᠤᠨ ᠰᠠᠬᠢᠯ ᠳᠦᠷᠢᠮ ᠪᠠᠶᠢᠵᠤ᠂ ᠨᠢᠬᠦᠯ ᠬᠢᠬᠦ᠂ ᠪᠤᠶᠠᠨ ᠦᠢᠯᠡᠳᠬᠦ ᠵᠡᠷᠬᠡ ᠶᠢᠨ ᠬᠡᠯᠡᠯᠬᠡ ᠪᠠᠷ ᠬᠦᠮᠦᠰ ᠤᠨ ᠠᠵᠢᠯᠯᠠᠭ᠎ᠠ ᠶᠢ ᠮᠠᠰᠢ ᠳᠢᠭᠯᠢᠮ ᠲᠠᠢ ᠪᠠᠷ ᠬᠦᠳᠦᠯᠦᠨ ᠵᠢᠯᠤᠭᠤᠳᠤᠳᠠᠭ ᠶᠤᠮ᠃ ︽ᠠᠶᠢᠯ  ᠳᠤ ᠤᠷᠤᠬᠤ ᠳᠠᠭᠠᠨ ᠬᠡᠷ ᠤᠨ ᠬᠢᠨᠢ ᠵᠡᠬᠦᠨ ᠳᠠᠯ᠎ᠠ ᠪᠠᠷ ᠳᠤᠭᠤᠶᠢᠯᠠᠨ ᠤᠴᠢᠳᠠᠭ᠂ ᠳᠡᠬᠡᠬᠦ  ᠳᠡᠭᠡᠨ ᠳᠠᠰᠢᠭᠤᠷ᠂ ᠳᠡᠬᠡᠰᠦ᠂ ᠬᠤᠭᠤᠰᠤᠨ ᠰᠠᠪᠠ᠂ ᠵᠡᠷ ᠵᠡᠪᠰᠡᠭ ᠢ ᠪᠠᠷᠢᠵᠤ ᠠᠶᠢᠯ ᠳᠤ ᠤᠷᠤᠵᠤ ᠪᠤᠯᠬᠤ ᠦᠭᠡᠢ︾ ᠬᠡᠳᠡᠭ᠃ ᠡᠨᠡ ᠬᠦ ᠴᠡᠬᠡᠷ ᠬᠤᠷᠢᠭ᠎ᠠ ᠪᠠᠷ ᠠᠪᠴᠤ ᠦᠵᠡᠪᠡᠯ ᠳᠠᠷᠤᠢ ᠠᠶᠢᠯ ᠬᠡᠷ᠂ ᠠᠶᠢᠮᠠᠭ ᠰᠠᠬᠠᠭᠠᠯᠳᠠᠨ ᠢᠶᠠᠨ ᠬᠦᠨᠳᠦᠳᠬᠡᠬᠦ ᠦᠭᠡᠢ ᠪᠠᠶᠢᠬᠤ ᠶᠢ ᠴᠡᠬᠡᠷᠯᠡᠭᠰᠡᠨ ᠤᠴᠢᠷ ᠪᠤᠯᠤᠨ᠎ᠠ᠃ ᠡᠨᠡ ᠮᠡᠳᠦ ᠪᠠᠷ ᠬᠦᠨᠳᠦᠯᠡᠬᠦ ᠶᠤᠰᠤᠨ ᠤ ᠴᠡᠬᠡᠷ᠂ ᠬᠡᠷ ᠤᠨ ᠴᠡᠬᠡᠷ᠂ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠴᠡᠬᠡᠷ᠂ ᠠᠳᠤᠭᠤᠰᠤ ᠮᠠᠯ ᠳᠤ ᠴᠡᠬᠡᠷᠯᠡᠬᠦ ᠵᠡᠷᠬᠡ ᠶᠢᠨ ᠠᠷᠪᠢᠨ ᠤᠯᠠᠨ ᠴᠡᠬᠡᠷ ᠬᠤᠷᠢᠭ᠎ᠠ ᠪᠠᠶᠢᠳᠠᠭ᠃          ᠨᠢᠬᠡ᠂ ᠬᠦᠨᠳᠦᠯᠡᠬᠦ ᠶᠤᠰᠤᠨ ᠤ ᠴᠡᠬᠡᠷ      ᠮᠤᠩᠭᠤᠯᠴᠤᠳ ᠬᠦᠮᠦᠨ ᠲᠠᠢ ᠵᠤᠯᠭᠠᠬᠤ  ᠳᠠᠭᠠᠨ ᠮᠠᠭᠤ ᠬᠡᠳᠡᠭ ᠦᠬᠡ ᠶᠢ ᠴᠡᠬᠡᠷᠯᠡᠨ᠎ᠡ᠃ ᠬᠦᠮᠦᠰ ᠲᠠᠢ ᠤᠴᠠᠷᠠᠪᠠᠯ ︽ᠰᠠᠶᠢᠨ ᠪᠠᠶᠢᠨ᠎ᠠ ᠤᠤ ︖︾᠂ ︽ᠠᠮᠤᠷ︾᠂ ︽ᠠᠮᠤᠭᠤᠯᠠᠩ︾ ᠬᠡᠵᠦ ᠮᠡᠡᠳᠦ ᠬᠢᠵᠦ ᠰᠠᠭᠤᠯᠵᠠᠬᠰᠠᠨ ᠤ ᠳᠠᠷᠠᠭ᠎ᠠ ︽ᠮᠠᠯ ᠰᠦᠷᠦᠭ ᠰᠠᠶᠢᠨ︾᠂ ︽ᠬᠤᠷ᠎ᠠ ᠪᠤᠷᠤᠭᠠᠨ ᠰᠠᠶᠢᠨ︾᠂ ︽ᠬᠦᠢᠳᠡᠨ ᠰᠠᠶᠢᠨ︾᠂ ︽ᠪᠡᠶ᠎ᠡ ᠰᠠᠶᠢᠨ︾᠂ ︽ᠪᠡᠯᠴᠢᠬᠡᠷ ᠰᠠᠶᠢᠨ︾ ᠬᠡᠬᠦ ᠮᠡᠳᠦ ᠪᠠᠷ ᠴᠠᠭ ᠤᠨ ᠦᠡᠭᠬᠡ᠂ ᠰᠠᠶᠢᠨ ᠤ ᠪᠡᠯᠬᠡ ᠪᠠᠷ ᠵᠦᠡᠭᠨᠡᠵᠦ ᠠᠮᠤᠷ ᠮᠡᠡᠳᠦ ᠠᠰᠠᠭᠤᠯᠴᠠᠨ ᠵᠤᠯᠭᠠᠬᠤ ᠪᠠᠨ ᠮᠠᠷᠳᠠᠳᠠᠭ ᠦᠭᠡᠢ ᠶᠤᠮ᠃ ᠬᠡᠷᠪᠡ ᠬᠡᠷ ᠪᠦᠯᠢ᠂ ᠠᠬ᠎ᠠ ᠳᠡᠬᠦᠦ᠂ ᠳᠦᠷᠦᠯ ᠰᠠᠳᠤᠨ ᠨᠢ ᠨᠠᠰᠤ ᠪᠠᠷᠠᠭᠰᠠᠨ ᠢ ᠮᠡᠳᠡᠪᠡᠯ ᠠᠮᠤᠷ ᠠᠰᠠᠭᠤᠳᠠᠭ ᠦᠭᠡᠢ᠂ ᠵᠦᠪᠬᠡᠨ ︽ᠶᠠᠭᠠᠷᠠᠵᠤ ᠪᠠᠶᠢᠨ᠎ᠠ ᠤᠤ︖︾ ᠬᠡᠬᠦ ᠮᠡᠳᠦ  ᠪᠠᠷ ᠬᠠᠷᠢᠯᠴᠠᠳᠠᠭ᠃ ᠡᠴᠢᠬᠡ ᠡᠬᠡ᠂ ᠠᠬ᠎ᠠ ᠡᠬᠡᠴᠢ᠂ ᠳᠦᠷᠦᠯ ᠰᠠᠳᠤᠨ ᠠᠴᠠ   ᠨᠢ ᠨᠠᠰᠤ ᠪᠠᠷᠠᠬᠰᠠᠨ ᠬᠦᠮᠦᠨ ᠤ ᠨᠡᠷ᠎ᠡ ᠲᠠᠢ ᠠᠳᠠᠯᠢ ᠨᠡᠷ᠎ᠡ  ᠲᠠᠢ ᠬᠦᠮᠦᠨ ᠢ ᠨᠡᠷ᠎ᠡ ᠪᠠᠷ ᠨᠢ ᠳᠠᠭᠤᠳᠠᠳᠠᠭ ᠦᠭᠡᠢ᠂ ᠡᠬᠢᠨ ᠤ ᠦᠰᠦᠭ ᠤᠨ ᠠᠪᠢᠶ᠎ᠠ ᠪᠠᠷ ᠨᠢ ᠳᠠᠭᠤᠳᠠᠳᠠᠭ ᠶᠤᠰᠤ ᠲᠠᠢ᠃ ᠡᠨᠡ ᠨᠢ ᠨᠠᠰᠤ ᠪᠠᠷᠠᠬᠰᠠᠨ ᠬᠦᠮᠦᠨ ᠢ ᠬᠦᠨᠳᠦᠳᠬᠡᠵᠦ ᠪᠠᠶᠢᠭ᠎ᠠ  ᠪᠠᠨ ᠢᠯᠡᠳᠬᠡᠵᠦ ᠪᠠᠶᠢᠬᠤ ᠤᠴᠢᠷ ᠵᠦᠢ ᠶᠤᠮ᠃ ᠦᠬᠦᠭᠰᠡᠳ ᠤᠨ ᠨᠡᠷ᠎ᠡ ᠶᠢ ᠳᠤᠷᠠᠳᠬᠤ ᠶᠢ ᠴᠡᠬᠡᠷᠯᠡᠳᠡᠭ ᠤᠨ ᠤᠴᠢᠷ ᠪᠤᠯ ᠬᠦᠮᠦᠨ ᠬᠡᠷᠪᠡ ᠦᠬᠦᠪᠡᠯ ᠳᠡᠬᠦᠨ ᠤ ᠰᠦᠨᠡᠰᠦ ᠨᠢ ᠡᠨᠡ ᠬᠦ ᠠᠶᠢᠯ ᠬᠡᠷ᠂ ᠳᠦᠷᠦᠯ ᠰᠠᠳᠤᠨ ᠢᠶᠠᠨ ᠬᠡᠵᠢᠶᠡᠳᠡ ᠡᠷᠬᠢᠴᠡᠨ ᠢᠪᠡᠬᠡᠵᠦ ᠪᠠᠶᠢᠳᠠᠭ ᠪᠤᠯᠬᠤᠷ ᠳᠡᠬᠦᠨ ᠢ ᠳᠠᠬᠢᠵᠤ ᠪᠠᠶᠠᠰᠬᠠᠬᠤ ᠬᠡᠷᠡᠭᠳᠡᠢ᠂ ᠡᠰᠡ ᠳᠡᠶᠢᠮᠦ ᠪᠤᠯ ᠳᠡᠷᠡ ᠬᠦ ᠰᠦᠨᠡᠰᠦ ᠨᠢ ᠳᠦᠢᠳᠴᠦ ᠬᠢᠵᠢᠭ ᠳᠠᠬᠤᠯ ᠬᠦᠷᠬᠡᠨ᠎ᠡ ᠬᠡᠵᠦ ᠦᠵᠡᠳᠡᠭ᠃      ᠵᠤᠴᠢᠨ ᠳᠤ ᠴᠠᠢ ᠠᠶᠠᠭᠠᠯᠠᠪᠠᠯ ᠬᠤᠶᠠᠷ ᠭᠠᠷ ᠢᠶᠠᠷ ᠢᠶᠠᠨ  ᠪᠠᠷᠢᠵᠤ ᠦᠭᠬᠦᠨ᠎ᠡ᠃ ᠬᠦᠮᠦᠨ ᠬᠠᠷ᠎ᠠ ᠠᠴᠠ ᠶᠠᠭᠤᠮ᠎ᠠ ᠬᠤᠮ᠎ᠠ ᠠᠪᠴᠤ ᠪᠠᠷᠢᠬᠤ  ᠳᠠᠭᠠᠨ ᠬᠤᠶᠠᠷ ᠭᠠᠷ ᠢᠶᠠᠷ ᠪᠤᠶᠤ ᠪᠠᠷᠠᠭᠤᠨ ᠭᠠᠷ  ᠢᠶᠠᠷ ᠢᠶᠠᠨ ᠳᠤᠰᠴᠤ ᠠᠪᠬᠤ ᠠᠴᠠ ᠪᠢᠰᠢ ᠵᠡᠬᠦᠨ ᠭᠠᠷ ᠢᠶᠠᠷ ᠢᠶᠠᠨ  ᠳᠤᠰᠴᠤ ᠠᠪᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃ ᠬᠦᠮᠦᠨ ᠠᠴᠠ ᠶᠠᠭᠤᠮ᠎ᠠ ᠠᠪᠬᠤ ᠪᠤᠶᠤ ᠬᠦᠮᠦᠨ ᠤ ᠬᠦᠷᠬᠡᠭᠰᠡᠨ ᠰᠠᠪᠠ ᠶᠢ ᠨᠢ ᠬᠤᠭᠤᠰᠤᠨ ᠪᠤᠴᠠᠭᠠᠬᠤ ᠶᠢ ᠴᠡᠬᠡᠷᠯᠡᠳᠡᠩ᠂ ᠵᠠᠪᠠᠯ ᠳᠤᠳᠤᠷ᠎ᠠ ᠨᠢ ᠪᠠᠭ᠎ᠠ ᠰᠠᠭ᠎ᠠ ᠢᠳᠡᠬᠦ ᠵᠦᠢᠯ ᠬᠢᠵᠦ ᠪᠤᠴᠠᠭᠠᠳᠠᠭ᠃ᠵᠠᠯᠠᠭᠤ ᠪᠠᠭᠠᠴᠤᠳ ᠤᠨᠤᠭ᠎ᠠ ᠲᠠᠢ ᠶᠠᠪᠤᠵᠤ ᠪᠠᠶᠢᠭᠠᠳ ᠠᠬᠠᠮᠠᠳ ᠬᠦᠮᠦᠨ ᠲᠠᠢ ᠤᠴᠠᠷᠠᠪᠠᠯ ᠤᠨᠤᠭ᠎ᠠ ᠠᠴᠠ ᠪᠠᠨ ᠪᠠᠭᠤᠬᠤ ᠦᠭᠡᠢ ᠪᠠᠷ ᠵᠦᠷᠢᠵᠦ ᠭᠠᠷᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃ ᠬᠠᠷᠢᠨ ᠤᠨᠤᠭ᠎ᠠ ᠠᠴᠠ ᠪᠠᠨ ᠪᠠᠭᠤᠵᠤ ᠠᠮᠤᠷ ᠡᠷᠢᠬᠡᠳ ᠶᠠᠪᠤᠨ᠎ᠠ᠃ ᠬᠠᠶᠢᠴᠢ᠂ ᠬᠢᠳᠤᠭ᠎ᠠ ᠵᠡᠷᠬᠡ ᠶᠢᠨ ᠡᠳ᠋ ᠤᠨ ᠢᠷ ᠢ ᠭᠠᠳᠠᠭᠰᠢ ᠪᠤᠶᠤ ᠬᠦᠮᠦᠨ ᠤ ᠦᠬᠡᠳᠡ ᠬᠠᠨᠳᠤᠭᠤᠯᠤᠨ ᠳᠠᠯᠪᠢᠬᠤ ᠦᠭᠡᠢ᠂ ᠪᠤᠰᠤᠳ ᠲᠤ ᠳᠠᠮᠵᠢᠭᠤᠯᠬᠤ ᠳᠠᠭᠠᠨ ᠴᠦ ᠢᠷ ᠢ  ᠨᠢ ᠪᠡᠶ᠎ᠡ ᠶᠢᠨ ᠢᠶᠠᠨ ᠵᠦᠭ ᠬᠠᠨᠳᠤᠭᠤᠯᠤᠨ ᠦᠭᠬᠦᠨ᠎ᠡ᠃          ᠬᠤᠶᠠᠷ᠂ ᠬᠡᠷ ᠤᠨ ᠴᠡᠬᠡᠷ      ᠭᠠᠯ ᠳᠠᠬᠢᠬᠰᠠᠨ ᠤ ᠳᠠᠷᠠᠭ᠎ᠠ ᠭᠤᠷᠪᠠᠨ ᠡᠳᠦᠷ ᠲᠤ ᠠᠳᠤᠭᠤ ᠮᠠᠯ᠂ ᠠᠮᠤ ᠳᠠᠷᠢᠶ᠎ᠠ ᠶᠢ ᠭᠠᠳᠠᠬᠰᠢ ᠭᠠᠷᠭᠠᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃ ᠤᠴᠢᠷ  ᠨᠢ ᠭᠠᠯ ᠳᠠᠬᠢᠬᠤ ᠪᠤᠯ ᠳᠡᠭᠷᠢ ᠠᠴᠠ ᠬᠡᠰᠢᠭ ᠭᠤᠶᠤᠵᠤ ᠪᠠᠶᠢᠭ᠎ᠠ ᠳᠤᠯᠠ ᠳᠡᠬᠦᠨ ᠢᠶᠠᠨ ᠬᠦᠯᠢᠶᠡᠬᠦ ᠪᠦᠬᠡᠳ ᠭᠠᠳᠠᠭᠰᠢ ᠰᠠᠷᠨᠢᠬᠤ ᠠᠴᠠ ᠰᠡᠷᠬᠡᠶᠢᠯᠡᠳᠡᠭ᠃      ᠰᠦᠨᠢ ᠦᠳᠡᠰᠢ ᠱᠦᠬᠦᠷ ᠬᠦᠳᠡᠯᠬᠡᠵᠦ ᠬᠤᠭ ᠦᠨᠡᠰᠦ ᠵᠡᠷᠬᠡ ᠶᠢ ᠬᠡᠷ ᠠᠴᠠ ᠭᠠᠷᠭᠠᠵᠤ ᠬᠠᠶᠠᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠪᠤᠭ ᠯᠠᠭ ᠱᠦᠬᠦᠷᠳᠡᠬᠦ ᠳᠡᠭᠡᠨ ᠨᠢᠬᠡ ᠳᠤᠤᠷ᠎ᠠ ᠬᠤᠶᠠᠷ ᠱᠦᠬᠦᠷ ᠬᠦᠳᠡᠯᠬᠡᠬᠦ ᠶᠢ ᠴᠡᠬᠡᠷᠯᠡᠨ᠎ᠡ᠃ ᠱᠦᠬᠦᠷ ᠪᠤᠶᠤ ᠤᠬᠢᠶᠠᠳᠠᠭᠤᠷ ᠢ ᠪᠦᠳᠦᠨ ᠢᠶᠠᠷ ᠨᠢ ᠬᠠᠶᠠᠬᠤ ᠦᠭᠡᠢ᠂ ᠡᠰᠡ ᠳᠡᠶᠢᠮᠦ ᠪᠤᠯ ᠪᠤᠭ ᠴᠢᠳᠬᠦᠷ ᠪᠤᠰᠤᠨ᠎ᠠ ᠬᠡᠳᠡᠭ᠃      ᠦᠨᠡᠰᠦ ᠪᠤᠯᠤᠨ ᠬᠤᠭ ᠯᠠᠭ ᠢᠶᠠᠨ ᠵᠠᠪᠠᠯ ᠵᠡᠬᠦᠨ ᠡᠮᠦᠨ᠎ᠡ ᠵᠦᠭ ᠲᠤ ᠠᠪᠠᠴᠢᠨ ᠠᠰᠬᠠᠵᠤ᠂ ᠬᠤᠭ ᠯᠠᠭ ᠨᠢ ᠵᠠᠪᠠᠯ ᠦᠨᠡᠰᠦᠨ ᠤᠪᠤᠭᠠᠨ ᠤ ᠬᠤᠶᠢᠳᠤ ᠳᠠᠯ᠎ᠠ ᠳᠤ ᠠᠰᠬᠠᠨ᠎ᠠ᠂ ᠦᠨᠡᠰᠦ ᠬᠤᠭ ᠯᠠᠭ ᠢ ᠨᠡᠶᠢᠯᠡᠬᠦᠯᠪᠡᠯ ᠪᠤᠭ ᠴᠢᠳᠬᠦᠷ ᠪᠤᠰᠤᠨ᠎ᠠ ᠬᠡᠳᠡᠭ᠂ ᠡᠶᠢᠮᠦ ᠠᠴᠠ ᠦᠨᠡᠰᠦ ᠬᠤᠭ ᠢ ᠨᠡᠶᠢᠯᠡᠬᠦᠯᠵᠦ ᠬᠠᠶᠠᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠡᠬᠦᠳᠡ ᠪᠠᠷ ᠭᠠᠷᠴᠤ ᠤᠷᠤᠬᠤ ᠳᠠᠭᠠᠨ ᠪᠤᠱᠤᠭ᠎ᠠ ᠤᠨᠤᠵᠤ ᠵᠤᠬᠰᠤᠬᠤ ᠪᠤᠶᠤ ᠬᠢᠰᠬᠢᠬᠦ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠬᠡᠯᠳᠡᠷᠬᠡᠢ ᠠᠶᠠᠭ᠎ᠠ ᠪᠠᠷ ᠬᠦᠮᠦᠨ ᠳᠤ ᠴᠠᠢ ᠪᠤᠳᠠᠭ᠎ᠠ ᠠᠶᠠᠭᠠᠯᠠᠪᠠᠯ ᠬᠡᠷ ᠤᠨ ᠪᠤᠶᠠᠨ ᠬᠠᠰᠤᠭᠳᠠᠨ᠎ᠠ ᠬᠡᠳᠡᠭ᠃      ᠬᠡᠷ ᠤᠨ ᠡᠬᠦᠳᠡ ᠶᠢ ᠪᠤᠷᠤᠭᠤ ᠳᠠᠯ᠎ᠠ  ᠠᠴᠠ ᠨᠢ ᠰᠡᠬᠦᠵᠦ ᠪᠤᠯᠬᠤ ᠦᠭᠡᠢ᠃      ᠬᠡᠷ ᠤᠨ ᠡᠬᠦᠳᠡᠨ ᠤ ᠵᠡᠬᠦᠨ ᠬᠠᠪᠢ ᠳᠤ ᠰᠠᠭᠤᠵᠤ ᠪᠤᠯᠬᠤ ᠦᠭᠡᠢ᠃ ᠵᠤᠤᠬ᠎ᠠ ᠳᠤᠯᠭᠠᠨ ᠳᠡᠬᠡᠷ᠎ᠡ ᠰᠠᠭᠤᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠳᠡᠬᠡᠰᠦ ᠴᠢᠷᠦᠬᠦ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠴᠢᠷᠦᠵᠦ ᠶᠠᠪᠤᠪᠠᠯ ᠠᠯᠢᠪᠠ ᠠᠵᠢᠯ ᠦᠢᠯᠡᠰ ᠴᠢᠷᠦᠯᠳᠦᠨ ᠤᠨᠵᠢᠷᠠᠵᠤ ᠰᠤᠨᠵᠢᠷᠠᠨ᠎ᠠ ᠬᠡᠳᠡᠭ᠃      ᠳᠤᠭᠤᠭᠠᠨ ᠳᠤᠳᠤᠷ᠎ᠠ ᠬᠤᠭᠤᠰᠤᠨ ᠤᠰᠤ ︵ᠬᠠᠷ᠎ᠠ ᠤᠰᠤ︶ ᠶᠢ ᠤᠳᠠᠭᠠᠨ ᠴᠠᠭ ᠢᠶᠠᠷ ᠪᠤᠴᠠᠯᠭᠠᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠤᠭᠤᠳᠠ ᠳᠠᠭᠠᠷᠴᠤᠭ ᠤᠨ ᠠᠮᠠᠰᠠᠷ ᠢ ᠳᠡᠷᠡ ᠪᠡᠶ᠎ᠡ ᠪᠠᠷ ᠨᠢ ᠵᠠᠩᠬᠢᠳᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠤᠴᠢᠷ ᠨᠢ ᠦᠬᠦᠭᠰᠡᠨ ᠬᠦᠮᠦᠨ ᠢ ᠬᠢᠳᠡᠭ ᠴᠠᠭᠠᠨ ᠳᠠᠭᠠᠷᠴᠤᠭ ᠢ ᠰᠡᠶ᠋ᠢ ᠳᠡᠬᠡᠵᠦ ᠤᠶᠠᠳᠠᠭ  ᠠᠴᠠ ᠢᠡᠭᠬᠢᠵᠦ ᠴᠡᠬᠡᠷᠯᠡᠳᠡᠭ ᠪᠠᠶᠢᠨ᠎ᠠ᠃      ᠮᠤᠷᠢ ᠤᠨᠤᠭ᠎ᠠ ᠳᠡᠬᠡᠷ᠎ᠡ ᠬᠤᠪᠴᠠᠰᠤ ᠪᠤᠶᠤ ᠰᠠᠪᠠ ᠶᠢ ᠭᠠᠨᠵᠤᠭᠠᠯᠠᠬᠤ ᠳᠤ ᠬᠦᠷᠪᠡᠯ ᠡᠷᠬᠡᠪᠡᠰᠢ ᠬᠤᠪᠴᠠᠰᠤᠨ ᠤ ᠵᠠᠭᠠᠮ᠎ᠠ ᠪᠠ ᠳᠠᠭᠠᠷᠴᠤᠭ ᠤᠨ ᠠᠮᠠ ᠶᠢ ᠵᠦᠪ ᠳᠠᠯ᠎ᠠ ᠵᠦᠭ ᠬᠠᠨᠳᠤᠭᠤᠯᠬᠤ ᠬᠡᠷᠡᠭᠳᠡᠢ᠃      ᠭᠠᠷᠤᠨ ᠤᠷᠤᠨ ᠬᠡᠨᠭᠰᠢᠪᠡᠯ ᠭᠠᠭᠴᠠᠭᠠᠷ ᠶᠠᠪᠤᠬᠤ ᠶᠢᠨ ᠳᠡᠮᠳᠡᠭ ᠬᠡᠵᠦ ᠬᠡᠵᠢᠶᠡᠳᠡ ᠬᠡᠨᠭᠰᠢᠬᠦ  ᠶᠢ ᠴᠡᠬᠡᠷᠯᠡᠨ᠎ᠡ᠃      ᠳᠡᠪᠢᠬᠦᠷ ᠢᠶᠠᠷ ᠶᠠᠭᠤᠮ᠎ᠠ ᠳᠠᠪᠢᠬᠦ ᠳᠡᠭᠡᠨ ᠬᠡᠷ ᠠᠴᠠ ᠪᠠᠨ ᠭᠠᠳᠠᠬᠰᠢ ᠬᠠᠨᠳᠤᠭᠤᠯᠤᠨ ᠳᠡᠪᠢᠵᠦ ᠪᠤᠯᠬᠤ ᠦᠭᠡᠢ᠂ ᠡᠰᠡ ᠳᠡᠶᠢᠮᠦ ᠪᠤᠯ ᠬᠡᠷ ᠤᠨ ᠪᠤᠶᠠᠨ ᠢᠶᠠᠨ ᠳᠠᠪᠢᠨ ᠭᠠᠷᠭᠠᠨ᠎ᠠ ᠬᠡᠳᠡᠭ᠃      ᠠᠶᠠᠭ᠎ᠠ ᠱᠠᠭᠠᠵᠠᠩ ᠢᠶᠠᠨ ᠰᠠᠵᠢᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠪᠤᠶᠠᠨ ᠬᠡᠰᠢᠭ ᠢᠶᠠᠨ ᠰᠠᠵᠢᠵᠤ ᠪᠠᠷᠠᠨ᠎ᠠ ᠬᠡᠳᠡᠭ᠃      ᠪᠢᠳᠡᠬᠦᠦ ᠰᠦᠨᠢ ᠭᠠᠵᠠᠷ ᠲᠤ ᠤᠰᠤ ᠠᠰᠬᠠᠪᠠᠯ ᠶᠠᠷ᠎ᠠ ᠰᠢᠷᠬᠠᠨ ᠳᠤ ᠪᠠᠷᠢᠬᠳᠠᠨ᠎ᠠ ᠬᠡᠵᠦ ᠴᠡᠬᠡᠷᠯᠡᠳᠡᠭ᠃ ᠶᠡᠭᠡ ᠰᠢᠭ ᠰᠠᠪᠠ ᠰᠠᠭᠤᠯᠠᠭ᠎ᠠ ᠳᠠᠯᠪᠢᠨ ᠠᠷᠴᠢᠬᠰᠠᠨ ᠤᠬᠢᠶᠠᠬᠰᠠᠨ ᠤᠰᠤ ᠪᠠᠨ ᠳᠡᠬᠦᠨ ᠳᠤ ᠬᠢᠵᠦ ᠪᠠᠶᠢᠭᠠᠳ ᠮᠠᠷᠭᠠᠰᠢ ᠶᠢᠨ ᠪᠠᠭ᠎ᠠ ᠦᠳᠡ ᠳᠤ ᠭᠠᠳᠠᠭᠰᠢ ᠠᠪᠠᠴᠢᠵᠤ ᠠᠰᠬᠠᠳᠠᠭ᠃            ᠭᠤᠷᠪᠠ᠂ ᠢᠳᠡᠬᠡᠨ ᠤᠮᠳᠠᠭᠠᠨ ᠤ ᠴᠡᠬᠡᠷ      ᠳᠠᠪᠤᠰᠤ ᠶᠢ ᠰᠠᠶᠢᠰᠠ ᠡᠯᠬᠡᠭ ᠢᠶᠠᠷ ᠰᠠᠶᠢᠰᠠᠳᠠᠵᠤ ᠳᠤᠭᠤᠭᠠᠨ ᠳᠤ ᠬᠢᠬᠦ᠂ ᠬᠦᠮᠦᠨ  ᠳᠤ ᠦᠭᠬᠦ ᠳᠡᠭᠡᠨ ᠠᠳᠬᠤ ᠪᠠᠷ ᠠᠳᠬᠤᠨ ᠰᠢᠭᠤᠳ ᠦᠭᠬᠦ ᠵᠡᠷᠬᠡ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠳᠠᠪᠤᠰᠤ ᠶᠢ ᠭᠠᠯ ᠳᠤ ᠬᠢᠵᠦ ᠪᠤᠯᠬᠤ ᠦᠭᠡᠢ᠃ ᠡᠰᠡ ᠳᠡᠶᠢᠮᠦ ᠪᠤᠯ ᠭᠠᠯ ᠪᠤᠷᠬᠠᠨ ᠰᠤᠴᠢᠨ᠎ᠠ ᠬᠡᠳᠡᠭ᠃      ᠰᠠᠷᠢᠮᠰᠤᠭ ᠢ ᠭᠠᠷ ᠢᠶᠠᠷ ᠳᠠᠮᠵᠢᠭᠤᠯᠤᠨ ᠦᠭᠴᠦ ᠪᠤᠯᠬᠤ ᠦᠭᠡᠢ᠂ ᠬᠡᠷᠪᠡ ᠳᠡᠬᠡᠪᠡᠯ ᠦᠰᠢᠶ᠎ᠡ ᠲᠠᠢ ᠪᠤᠯᠤᠨ᠎ᠠ ᠬᠡᠳᠡᠭ      ᠬᠡᠦᠬᠡᠳ ᠪᠤᠭᠤᠨᠢ ᠬᠠᠪᠢᠰᠤ ᠢᠳᠡᠵᠦ ᠪᠤᠯᠬᠤ ᠦᠭᠡᠢ  ᠂ ᠬᠡᠷᠪᠡ ᠢᠳᠡᠪᠡᠯ ᠦᠨᠦᠴᠢᠨ ᠦᠷᠦᠬᠡᠰᠦᠨ ᠪᠤᠯᠤᠨ᠎ᠠ ᠬᠡᠳᠡᠭ᠃      ᠳᠠᠯᠤ ᠶᠢ ᠢᠳᠡᠬᠦ ᠳᠡᠭᠡᠨ ᠵᠠᠪᠠᠯ ᠤᠬᠳᠤᠯᠵᠤ ᠢᠳᠡᠨ᠎ᠡ᠂ ᠰᠢᠳᠦ ᠪᠠᠷ ᠬᠠᠵᠠᠵᠤ ᠢᠳᠡᠵᠦ ᠪᠤᠯᠬᠤ ᠦᠭᠡᠢ᠃ ᠳᠠᠯᠤ ᠶᠢ ᠳᠠᠶᠠᠭᠠᠷ ᠢᠳᠡᠬᠦ ᠠᠴᠠ  ᠭᠠᠭᠴᠠᠭᠠᠷ ᠢᠳᠡᠳᠡᠭ ᠦᠭᠡᠢ᠃ ᠡᠶᠢᠮᠦ ᠠᠴᠠ ︽ᠳᠠᠯᠤ ᠶᠢᠨ ᠮᠢᠬ᠎ᠠ ᠶᠢ ᠳᠠᠶᠠᠭᠠᠷ  ᠢᠶᠠᠨ ᠵᠤᠭᠤᠬᠯᠠ︾ ᠬᠡᠳᠡᠭ ᠦᠬᠡ ᠪᠤᠢ᠃      ᠡᠯᠢᠬᠡ ᠶᠢ ᠤᠭᠳᠤᠯᠬᠤ ᠠᠴᠠ ᠪᠢᠰᠢ ᠡᠮᠳᠡᠯᠡᠵᠦ ᠰᠠᠯᠭᠠᠵᠤ ᠪᠤᠯᠬᠤ ᠦᠭᠡᠢ᠂ ᠤᠷᠤᠭ ᠳᠦᠷᠦᠯ ᠤᠨ ᠶᠡᠭᠡ ᠨᠢᠬᠡᠳᠦᠯ ᠢ ᠡᠯᠢᠬᠡ ᠯᠡ ᠳᠦᠯᠦᠬᠡᠯᠡᠨ᠎ᠡ ᠬᠡᠳᠡᠭ᠃      ᠮᠠᠭᠤ ᠰᠠᠷᠬᠢᠨᠠᠭ ᠢ ᠬᠡᠦᠬᠡᠳ ᠢᠳᠡᠪᠡᠯ ᠰᠠᠷᠳᠠᠭ ᠪᠠᠷᠳᠠᠭ ︵ᠮᠠᠭᠤ ᠵᠠᠩ︶ ᠵᠠᠩ ᠲᠠᠢ ᠪᠤᠯᠤᠨ᠎ᠠ ᠬᠡᠳᠡᠭ᠃      ᠠᠶᠢᠯ ᠤᠨ ᠭᠠᠭᠴᠠ ᠬᠦᠦ ᠪᠤᠬᠳᠤ ᠴᠢᠮᠦᠬᠡ ᠢᠳᠡᠳᠡᠭ ᠦᠭᠡᠢ᠃ ᠱᠠᠭ᠎ᠠ ᠴᠢᠮᠦᠬᠡᠨ ᠤ ᠬᠠᠯᠢᠰᠤ ᠶᠢ ᠢᠳᠡᠵᠦ ᠪᠤᠯᠬᠤ ᠵᠠᠪᠠᠯ ᠦᠭᠡᠢ ᠳᠦᠯᠡᠳᠡᠭ᠃      ᠳᠤᠭᠤᠢ ᠬᠡᠯᠪᠡᠷᠢᠳᠡᠢ ᠪᠤᠭᠤᠷᠰᠤᠭ ᠬᠢᠪᠡᠯ ᠵᠠᠪᠠᠯ ᠨᠠᠢᠮᠠᠨ ᠭᠤᠯᠳᠤ ᠵᠢᠷᠤᠭᠠᠰᠤ ᠶᠢᠨ ᠨᠦᠬᠡ ᠭᠠᠷᠭᠠᠨ᠎ᠠ᠂ ᠵᠢᠷᠤᠭᠠᠰᠤᠨ ᠨᠦᠬᠡ ᠦᠭᠡᠢ ᠪᠤᠶᠤ ᠬᠤᠸᠠᠷ ᠪᠢᠨᠳᠠᠷᠢᠶᠠᠨ ᠦᠭᠡᠢ ᠪᠤᠭᠤᠷᠰᠤᠭ ᠢ ᠪᠤᠯ ᠦᠬᠦᠭᠰᠡᠨ ᠬᠦᠮᠦᠨ ᠤ ᠡᠮᠦᠨ᠎ᠡ ᠳᠠᠯᠪᠢᠳᠠᠭ᠃            ᠳᠦᠷᠪᠡ᠂ ᠠᠳᠤᠭᠤᠰᠤ ᠮᠠᠯ ᠳᠤ ᠴᠡᠬᠡᠷᠯᠡᠬᠦ ᠶᠤᠰᠤ      ᠮᠠᠯ ᠳᠤᠭᠠᠯᠠᠬᠤ ᠳᠠᠭᠠᠨ ᠭᠠᠭᠴᠠ ᠬᠤᠷᠤᠭᠤ ᠪᠠᠷ ᠢᠶᠠᠨ ᠳᠤᠶ᠋ᠢᠵᠤ ᠳᠤᠭᠠᠯᠠᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃ᠵᠢᠷᠮᠦᠰᠦᠨ ᠡᠮᠡᠭᠳᠡᠢ ᠳᠡᠮᠡᠭᠡ ᠤᠨᠤᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠬᠡᠷᠪᠡ ᠤᠨᠤᠬᠤ ᠴᠢᠬᠤᠯᠠ ᠲᠠᠢ ᠪᠤᠯ ᠬᠦᠯ ᠳᠤᠤᠭᠤᠷ ᠨᠢ ᠦᠡᠭᠬᠡᠷᠡᠵᠦ ᠭᠠᠷᠤᠨ᠎ᠠ᠃ ᠳᠡᠮᠡᠬᠡᠨ ᠤ ᠵᠦᠭ ᠰᠢᠬᠡᠵᠦ ᠪᠤᠯᠬᠤ ᠦᠭᠡᠢ᠃ ᠡᠰᠡ ᠳᠡᠶᠢᠮᠦ ᠪᠤᠯ ᠰᠡᠳᠡᠷᠬᠡᠢ ᠤᠷᠤᠭᠤᠯ ᠲᠠᠢ ᠬᠡᠦᠬᠡᠳ ᠲᠠᠢ ᠪᠤᠯᠤᠨ᠎ᠠ ᠬᠡᠳᠡᠭ᠃      ᠡᠮᠨᠢᠭ ᠮᠤᠷᠢ ᠤᠨᠤᠪᠠᠯ ᠴᠢᠳᠤᠷ ᠪᠦᠰᠡᠯᠡᠬᠦ ᠬᠡᠷᠡᠭᠳᠡᠢ᠂ ᠳᠡᠬᠡᠪᠡᠯ ᠶᠠᠰᠤ ᠬᠤᠭᠤᠷᠠᠬᠤ ᠦᠭᠡᠢ ᠬᠡᠳᠡᠭ᠃      ᠬᠤᠨᠢ ᠭᠠᠷᠭᠠᠬᠤ ︵ᠠᠯᠠᠬᠤ︶ ᠳᠠᠭᠠᠨ ᠵᠠᠪᠠᠯ ᠴᠠᠭᠠᠨ ᠢᠰᠡᠬᠡᠢ ᠳᠡᠪᠢᠰᠦᠨ᠎ᠡ᠂ ᠤᠴᠢᠷ ᠨᠢ ᠬᠤᠨᠢ ᠪᠤᠯ ᠳᠡᠭᠷᠢ ᠶᠢᠨ ᠤᠳᠤᠮ ᠲᠠᠢ ᠬᠡᠳᠡᠭ ᠳᠤᠯᠠ ᠡᠰᠡ ᠳᠡᠶᠢᠮᠦ ᠪᠤᠯ ᠳᠡᠭᠷᠢ ᠪᠤᠷᠤᠭᠤ ᠪᠠᠷ ᠦᠵᠡᠨ᠎ᠡ ᠬᠡᠳᠡᠭ᠃ᠮᠤᠷᠢᠨ ᠤ ᠳᠤᠯᠤᠭᠠᠢ ᠤᠷᠤᠭᠤ ᠴᠤᠬᠢᠪᠠᠯ ᠮᠤᠷᠢ ᠴᠢᠮ᠎ᠡ ᠶᠢ ᠪᠤᠷᠤᠭᠤ ᠪᠠᠷ ᠦᠵᠡᠨ᠎ᠡ ᠬᠡᠳᠡᠭ᠃      ᠦᠬᠡᠷ ᠤᠨ ᠡᠪᠡᠷ ᠢ ᠴᠤᠬᠢᠬᠤ ᠦᠭᠡᠢ᠂ ᠨᠢᠬᠡ ᠦᠬᠡᠷ ᠤᠨ ᠡᠪᠡᠷ ᠢ ᠴᠤᠬᠢᠪᠠᠯ ᠮᠢᠩᠭᠠᠨ ᠦᠬᠡᠷ ᠤᠨ ᠡᠪᠡᠷ ᠱᠠᠷᠬᠢᠷᠠᠨ᠎ᠠ ᠬᠡᠳᠡᠭ᠃      ᠮᠠᠯ ᠤᠨ ᠬᠤᠶᠢᠨ᠎ᠠ ᠠᠴᠠ ᠰᠢᠷᠦᠢ ᠰᠠᠴᠤᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠮᠠᠯ ᠤᠨ ᠢᠶᠠᠨ ᠪᠤᠶᠠᠨ ᠬᠡᠰᠢᠭ ᠢ ᠬᠡᠶᠢᠰᠬᠡᠨ᠎ᠡ ᠬᠡᠳᠡᠭ᠃      ᠮᠤᠷᠢ ᠤᠨᠤᠭ᠎ᠠ ᠶᠢ ᠪᠤᠷᠤᠭᠤ ᠳᠠᠯ᠎ᠠ ᠠᠴᠠ  ᠨᠢ ᠤᠨᠤᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠤᠷᠪᠠᠵᠤ ᠳᠤᠳᠠᠭᠠᠬᠤ ᠦᠶ᠎ᠡ ᠳᠤ ᠰᠡᠶ᠋ᠢ ᠢᠡᠭᠬᠢᠳᠡᠭ᠃      ᠰᠦ ᠦᠭᠡᠢ ᠢᠮᠠᠭᠠᠨ ᠤ ᠳᠡᠯᠢᠩ ᠢ ᠪᠠᠷᠢᠵᠤ ᠳᠡᠮᠳᠡᠷᠢᠬᠦ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠬᠡᠷᠪᠡ ᠳᠡᠮᠳᠡᠷᠢᠪᠡᠯ ᠭᠠᠷ ᠤᠷᠤᠭᠤ ᠪᠠᠨ ᠨᠢᠯᠪᠤᠬᠤ ᠪᠤᠶᠤ ᠦᠯᠢᠶᠡᠬᠦ ᠳᠤᠮ ᠬᠢᠳᠡᠭ᠃      ᠮᠠᠯ ᠬᠤᠢ ᠪᠠᠨ ᠠᠳᠤᠭᠤᠯᠵᠤ ᠳᠠᠭᠤᠬᠤ  ᠳᠠᠭᠠᠨ ᠰᠢᠯᠡᠬᠡᠪᠦᠷ᠂ ᠳᠦᠯᠡᠩᠬᠡᠢ ᠦᠵᠦᠬᠦᠷ ᠲᠠᠢ ᠮᠤᠳᠤ ᠪᠠᠷᠢᠵᠤ ᠶᠠᠪᠤᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠡᠰᠡ ᠳᠡᠶᠢᠮᠦ ᠪᠤᠯ ᠬᠤᠳᠠ ᠬᠠᠷᠠᠯᠠᠨ᠎ᠠ ᠬᠡᠳᠡᠭ᠃      ᠮᠠᠯ ᠳᠤ ᠶᠠᠪᠤᠬᠤ ᠳᠠᠭᠠᠨ ᠤᠬᠢᠯᠠᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠮᠠᠯ ᠳᠤᠨᠢ ᠤᠬᠢᠯᠠᠩᠬᠠᠢ ᠡᠪᠡᠳᠴᠢᠨ ᠳᠤᠰᠤᠨ᠎ᠠ ᠬᠡᠳᠡᠭ᠃      ᠮᠠᠯ ᠬᠤᠳᠠᠯᠳᠤᠪᠠᠯ ᠬᠡᠰᠢᠭ ᠲᠠᠢ ᠨᠢ ᠦᠭᠬᠦ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠵᠠᠪᠠᠯ ᠮᠠᠯ ᠤᠨ ᠬᠡᠰᠢᠭ ᠬᠡᠵᠦ ᠨᠤᠤᠰᠤ᠂ ᠳᠡᠯ ᠰᠡᠬᠦᠯ ᠠᠴᠠ ᠨᠢ ᠨᠢᠬᠡ ᠤᠷᠢᠶᠠᠮᠠᠭ ᠠᠪᠴᠤ ᠦᠯᠡᠳᠡᠬᠡᠨ᠎ᠡ᠃      ᠪᠢᠳᠡᠬᠦᠦ ᠪᠦᠭᠰᠡ ᠲᠠᠢ ᠳᠦᠯ ᠭᠠᠷᠪᠠᠯ ᠦᠬᠡᠷ᠎ᠡ ᠶᠠᠭᠤᠮ᠎ᠠ ᠪᠠᠷ ᠴᠤᠭᠤᠯᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠵᠠᠪᠠᠯ ᠡᠩ ᠤᠨ ᠡᠰᠢ ᠶᠢᠨ ᠦᠵᠦᠬᠦᠷ ᠢᠶᠠᠷ ᠴᠤᠭᠤᠯᠤᠨ᠎ᠠ᠃      ᠦᠬᠦᠭᠰᠡᠨ ᠮᠠᠯ ᠢ ᠪᠦᠳᠦᠨ ᠢᠶᠠᠷ ᠨᠢ ᠬᠠᠶᠠᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠵᠠᠪᠠᠯ ᠬᠡᠳᠡᠰᠦ ᠳᠤᠳᠤᠷ ᠢ ᠨᠢ ᠭᠠᠷᠭᠠᠵᠤ ᠬᠠᠶᠠᠨ᠎ᠠ᠃            ᠳᠠᠪᠤ᠂ ᠪᠤᠰᠤᠳ ᠴᠡᠬᠡᠷ      ᠳᠠᠭᠤᠳᠤ ᠪᠤᠷᠤᠭᠠᠨ ᠤ ᠦᠶ᠎ᠡ ᠳᠤ ᠡᠬᠦᠳᠡᠨ ᠪᠤᠱᠤᠭ᠎ᠠ ᠳᠡᠬᠡᠷ᠎ᠡ ᠵᠤᠬᠰᠤᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠳᠠᠷᠢᠬᠢ ᠪᠠᠨ ᠳᠤᠮᠨᠠᠭᠤᠯᠤᠬᠰᠠᠨ ᠬᠦᠮᠦᠨ ᠭᠤᠷᠪᠠ ᠬᠤᠨᠤᠭ ᠤᠨ ᠳᠤᠳᠤᠷ᠎ᠠ ᠤᠨᠤᠭ᠎ᠠ ᠤᠨᠤᠵᠤ ᠭᠤᠤᠯ ᠬᠡᠳᠦᠯᠬᠦ ᠪᠤᠶᠤ ᠵᠠᠮ ᠤᠭᠳᠤᠯᠤᠨ ᠭᠠᠷᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠪᠤᠰᠤᠳ ᠬᠦᠮᠦᠨ ᠤ ᠬᠡᠳᠡ ᠶᠢ ᠳᠤᠷ᠎ᠠ  ᠪᠠᠷ ᠨᠡᠬᠡᠬᠡᠬᠦ ᠪᠤᠶᠤ ᠴᠠᠬᠢᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠰᠦᠬᠡ ᠠᠯᠤᠬᠠᠨ ᠳᠡᠬᠡᠬᠦᠷ ᠠᠯᠬᠤᠵᠤ ᠭᠠᠷᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠳᠡᠮᠦᠷ ᠢ ᠳᠡᠭᠷᠢ ᠶᠢᠨ ᠰᠠᠬᠢᠭᠤᠯᠰᠤᠨ ᠬᠡᠳᠡᠭ᠃      ᠬᠠᠶᠢᠴᠢ ᠰᠢᠪᠦᠬᠡᠨ ᠤ ᠳᠡᠬᠡᠬᠦᠷ ᠬᠢᠰᠬᠢᠬᠦ ᠪᠤᠶᠤ ᠠᠯᠬᠤᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠠᠮᠠᠭᠠᠢ ᠶᠠᠷ᠎ᠠ ᠪᠤᠶᠤ ᠬᠠᠶᠢᠴᠢᠯᠠᠭᠤᠷ ᠶᠠᠷ᠎ᠠ ᠭᠠᠷᠤᠨ᠎ᠠ ᠬᠡᠳᠡᠭ᠃      ᠬᠡᠨᠭᠰᠢᠬᠦᠦ ᠳᠦᠯᠡᠪᠡᠯ ᠳᠦᠬᠦᠬᠡᠢ ᠢᠳᠡᠬᠡᠨ  ᠢ ᠴᠡᠬᠡᠷᠯᠡᠨ᠎ᠡ᠂ ᠤᠴᠢᠷ ᠨᠢ ᠬᠡᠨᠭᠰᠢᠬᠦᠦ ᠪᠤᠯ ᠪᠡᠶ᠎ᠡ ᠦᠡᠭᠬᠡᠷᠡᠭᠰᠡᠳ ᠲᠤ ᠢᠳᠡᠬᠦᠯᠬᠦ ᠶᠢᠨ ᠳᠦᠯᠦᠬᠡ ᠶᠤᠮ ᠬᠡᠳᠡᠭ᠃      ᠬᠦᠮᠦᠨ ᠤ ᠡᠮᠦᠨ᠎ᠡ ᠠᠴᠠ ᠨᠢᠯᠪᠤᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠂ ᠪᠤᠶᠠᠨ ᠬᠡᠰᠢᠭ ᠢᠶᠠᠨ ᠪᠠᠷᠠᠯ᠎ᠠ ᠬᠡᠳᠡᠭ᠃      ᠳᠡᠷᠬᠡ ᠤᠨᠤᠭ᠎ᠠ ᠪᠠᠨ ᠠᠶᠢᠯ ᠤᠨ ᠰᠠᠩ ᠬᠡᠶᠢᠮᠤᠷᠢ ᠶᠢᠨ ᠬᠠᠵᠠᠭᠤᠳᠠ ᠵᠤᠬᠰᠤᠭᠠᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠤᠷᠤᠭ ᠪᠠᠷᠢᠯᠳᠤᠬᠤ ᠠᠴᠠ ᠡᠮᠦᠨ᠎ᠡ ᠬᠠᠨᠵᠢᠶᠠᠷ ᠡᠮᠦᠰᠬᠦ ᠶᠢ ᠴᠡᠬᠡᠷᠯᠡᠨ᠎ᠡ᠃ ᠬᠠᠨᠵᠢᠶᠠᠷ ᠪᠤᠯ ᠤᠷᠤᠭ ᠪᠠᠷᠢᠯᠳᠤᠬᠰᠠᠨ ᠤ ᠳᠡᠮᠳᠡᠭ ᠪᠤᠯᠤᠨ᠎ᠠ ᠃      ᠪᠠᠷᠰ ᠡᠳᠦᠷ ᠦᠰᠦ ᠠᠪᠤᠪᠠᠯ  ︵ᠵᠠᠰᠠᠬᠤ ︶ ᠠᠳᠡ ᠳᠤᠳᠬᠠᠷ ᠤᠯᠤᠨ᠎ᠠ᠃      ᠡᠬᠦᠳᠡ ᠪᠠᠷ ᠱᠠᠬᠠᠶᠢᠬᠤ᠂ ᠪᠤᠱᠤᠭ᠎ᠠ  ᠠᠯᠳᠠᠯᠠᠪᠠᠯ ᠯᠤᠤ ᠰᠤᠴᠢᠨ᠎ᠠ ᠬᠡᠳᠡᠭ᠃      ᠰᠦᠨᠢ ᠶᠠᠪᠤᠵᠤ ᠪᠠᠶᠢᠭᠠᠳ ᠡᠷᠬᠢᠵᠦ ᠬᠠᠷᠠᠪᠠᠯ ᠮᠦᠷᠦᠨ ᠳᠡᠬᠡᠷᠡᠬᠢ ᠵᠤᠯᠠ ᠨᠢ ᠤᠨᠳᠠᠷᠠᠨ᠎ᠠ ᠬᠡᠳᠡᠭ᠃      ᠮᠤᠳᠤ ᠰᠢᠳᠠᠮ ᠢᠶᠠᠷ ᠭᠠᠵᠠᠷ ᠳᠡᠯᠡᠳᠬᠦ᠂ ᠴᠤᠬᠢᠬᠤ ᠶᠢ ᠮᠠᠭᠤ ᠢᠷᠸ᠎ᠠ ᠬᠡᠳᠡᠭ᠃      ᠡᠬᠡᠨᠡᠷ ᠬᠦᠮᠦᠨ ᠭᠠᠯ ᠳᠡᠬᠡᠬᠦᠷ ᠠᠯᠬᠤᠵᠤ ᠪᠤᠯᠬᠤ ᠦᠭᠡᠢ᠃      ᠡᠬᠡᠨᠡᠷ ᠬᠦᠮᠦᠨ ᠤᠳᠬᠤᠭᠤᠷ ᠤᠨ ᠰᠢᠵᠢᠮ ᠪᠠ ᠳᠡᠬᠡᠰᠦ ᠠᠯᠳᠠᠯᠠᠵᠤ ᠪᠠᠶᠢᠪᠠᠯ ᠳᠡᠬᠦᠨ  ᠤ ᠳᠡᠬᠡᠬᠦᠷ ᠠᠯᠬᠤᠵᠤ ᠭᠠᠷᠬᠤ ᠶᠢ ᠴᠡᠬᠡᠷᠯᠡᠨ᠎ᠡ᠃      ᠨᠤᠬᠠᠢ ᠵᠠᠶᠢᠳᠠᠯᠠᠪᠠᠯ ᠦᠮᠦᠳᠦᠨ ᠠᠯᠠ ᠤᠷᠠᠬᠳᠠᠨ᠎ᠠ ᠬᠡᠵᠦ ᠴᠡᠬᠡᠷᠯᠡᠳᠡᠭ᠃      ᠤᠬᠤᠨ᠎ᠠ ᠤᠨᠤᠪᠠᠯ ᠡᠪᠦᠳᠦᠭ ᠳᠤᠨᠢ ᠶᠠᠷ᠎ᠠ ᠭᠠᠷᠤᠨ᠎ᠠ ᠬᠡᠳᠡᠭ᠃      ᠬᠤᠴᠠ ᠤᠨᠤᠪᠠᠯ ᠬᠤᠳᠠᠨ ᠳᠤ ᠴᠢᠨ᠋ᠸ᠎ᠠ ᠢᠷᠡᠨ᠎ᠡ ᠬᠡᠳᠡᠭ᠃
ᠢᠷᠡᠯᠲᠡ᠄ ᠬᠠᠩᠭᠢᠨ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠵᠠᠰᠠᠭ ᠤᠨ ᠶᠠᠪᠤᠳᠠᠯ ᠤᠨ ᠮᠤᠩᠭᠤᠯ ᠬᠡᠯᠡᠨ ᠤ ᠰᠦᠯᠵᠢᠶ᠎ᠡ