ᠮᠤᠩᠭᠤᠯᠴᠤᠳ ᠤᠨ ᠶᠠᠰᠤ ᠶᠢ ᠡᠷᠬᠢᠮᠯᠡᠨ ᠳᠡᠭᠡᠳᠦᠯᠡᠳᠡᠭ ᠤᠨ ᠤᠴᠢᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018/7/23
     ᠮᠤᠩᠭᠤᠯᠴᠤᠳ ᠠᠯᠢ ᠡᠷᠳᠡᠨ ᠠᠴᠠ ᠠᠪᠤᠭᠠᠳ ᠶᠠᠰᠤ ᠶᠢ ᠮᠠᠰᠢᠳᠠ ᠡᠷᠬᠢᠮᠯᠡᠨ ᠳᠡᠭᠡᠳᠦᠯᠡᠳᠡᠭ᠃      ᠮᠤᠩᠭᠤᠯᠴᠤᠳ ᠤᠨ ᠶᠠᠰᠤ ᠶᠢ ᠡᠷᠬᠢᠮᠯᠡᠨ ᠳᠡᠭᠡᠳᠦᠯᠡᠬᠦ ᠵᠠᠩ ᠦᠢᠯᠠ ᠨᠢ ᠡᠷᠳᠡᠨ ᠠᠴᠠ ᠤᠯᠠᠮᠵᠢᠯᠠᠯ ᠲᠠᠢ ᠮᠦᠷᠳᠡᠭᠡᠨ ᠦᠷᠦᠭᠡᠯ ᠪᠤᠰᠤᠳ ᠠᠴᠠ ᠢᠯᠭᠠᠭᠳᠠᠬᠤ ᠤᠨᠴᠠᠯᠢᠭ ᠲᠠᠢ ᠪᠠᠶᠢᠳᠠᠭ᠃ ᠮᠤᠩᠭᠤᠯᠴᠤᠳ ᠮᠠᠯ ᠢᠶᠠᠨ ᠳᠦᠬᠦᠬᠡᠷᠴᠤ ᠪᠠᠵᠠᠭᠠᠵᠦ ᠮᠢᠬ᠎ᠠ ᠶᠢ ᠨᠢ ᠢᠳᠡᠴᠢᠭᠡᠭᠡᠳ᠂ ᠶᠠᠰᠤ ᠶᠢ ᠨᠢ ᠶᠠᠷᠦ ᠠᠴᠠ ᠳᠤᠷ᠎ᠠ ᠪᠠᠷ ᠬᠠᠶᠠᠵᠦ ᠭᠡᠭᠡᠳᠡᠭ ᠦᠭᠡᠢ ᠪᠦᠭᠡᠳ ᠨᠤᠬᠠᠢ ᠰᠢᠪᠠᠭᠤ ᠳᠤ ᠴᠤ ᠳᠠᠷᠠ ᠪᠤᠯᠭᠠᠨ ᠢ ᠦᠭᠳᠡᠭ ᠦᠭᠡᠢ᠃ ᠭᠡᠷᠡᠭᠴᠡᠭᠡ ᠵᠠᠷᠤᠯᠭ᠎ᠠ᠂ ᠦᠢᠯᠠᠳᠦᠯ ᠠᠰᠢᠭᠯᠠᠭ᠎ᠠ ᠶᠢ ᠨᠢ ᠦᠨᠳᠦᠰᠦᠯᠠᠨ ᠭᠡᠰᠡᠭᠯᠡᠵᠦ ᠪᠦᠯᠦᠭᠯᠡᠨ ᠬᠤᠷᠢᠶᠠᠵᠦ ᠬᠠᠳᠠᠭᠠᠯᠠᠳᠠᠭ ᠪᠤᠶᠤ ᠳᠠᠮᠠᠢ ᠭᠡᠷᠡᠭᠴᠡᠭᠡ ᠦᠭᠡᠢ ᠶᠢ ᠨᠢ ᠴᠤ ᠤᠨᠴᠠᠯᠢᠭ ᠰᠢᠨᠵᠢ ᠶᠢ ᠨᠢ ᠦᠵᠠᠨ ︽ᠤᠷᠤᠨ ᠪᠠᠶᠢᠷᠢ︾ ᠤᠯᠭᠤᠨ ᠳᠣᠭᠢᠯᠢᠭ ᠰᠢᠢᠳᠪᠤᠷᠢᠯᠡᠳᠡᠭ᠃ ᠭᠡᠭᠡᠷ᠎ᠡ ᠭᠠᠳᠠᠨ᠎ᠠ ᠬᠠᠶᠠᠭᠰᠠᠨ ᠮᠠᠯ ᠤᠨ ᠶᠠᠰᠦ ᠶᠢ ᠴᠤ ᠳᠤᠷ᠎ᠠ ᠪᠠᠷ ᠢᠶᠠᠨ ᠬᠢᠰᠬᠢᠴᠠᠵᠦ ᠢᠰᠬᠦᠴᠢᠵᠦ ᠭᠡᠮᠭᠡᠴᠠᠵᠦ ᠪᠠᠯᠪᠠᠴᠢᠳᠠᠭ ᠦᠭᠡᠢ᠃ ᠮᠠᠯ ᠤᠨ ᠶᠠᠰᠤ ᠶᠢ ᠳᠤᠷ᠎ᠠ ᠪᠠᠷ ᠨᠢ ᠬᠠᠶᠠᠵᠦ ᠭᠡᠭᠡᠭᠦ ᠪᠤᠶᠤ ᠭᠡᠮᠭᠡᠴᠠᠵᠦ ᠪᠠᠯᠪᠠᠴᠢᠪᠠᠯ ︽ᠮᠠᠯ ᠤᠨ ᠭᠡᠰᠢᠭ ︵ᠵᠠᠶᠠᠭ᠎ᠠ︶ ᠪᠠᠭᠤᠷᠠᠨ᠎ᠠ᠂ ᠮᠠᠯ ᠦᠰᠬᠦ ᠦᠭᠡᠢ ᠦᠷᠠᠵᠢᠬᠦ ᠦᠭᠡᠢ ᠪᠤᠯᠤᠨ᠎ᠠ︾ ᠭᠡᠵᠦ ᠴᠤ ᠭᠡᠯᠡᠳᠡᠭ᠃ ᠮᠤᠩᠭᠤᠯᠴᠤᠳ ᠶᠠᠰᠦ ᠶᠢ ᠬᠠᠮᠤᠭ ᠤᠨ ᠬᠠᠳᠠᠭᠤ᠂ ᠴᠢᠨᠠᠷᠯᠢᠭ ᠶᠠᠭᠤᠮ᠎ᠠ ᠪᠠᠷ ᠦᠵᠡᠳᠡᠭ᠃ ᠠᠯᠢᠪᠠ ᠶᠠᠭᠤᠮᠠᠨ ᠤ ᠴᠢᠨᠠᠷ᠂ ᠦᠨ᠎ᠠ ᠦᠷᠳᠡᠭ ᠢ ᠶᠠᠰᠤ ᠪᠠᠷ ᠵᠢᠱᠢᠶᠠᠯᠠᠵᠦ ᠦᠨᠠᠯᠠᠳᠡᠭ᠃ ᠬᠦᠮᠦᠨ ᠤ ᠰᠠᠶᠢᠨ ᠮᠠᠭᠤ ︵ᠬᠦᠮᠦᠨ ᠴᠢᠨᠠᠷ︶ ᠶᠢ ᠨᠢ ᠰᠢᠨᠵᠢᠬᠦ ᠳᠤ ︽ᠶᠠᠰᠦ ᠶᠢ ᠨᠢ ᠦᠵᠠᠵᠦ ᠶᠠᠩᠵᠦ ᠶᠢ ᠨᠢ ᠳᠠᠨᠢ︾ ᠭᠡᠳᠡᠭ ᠪᠤᠶᠤ ᠡᠷ᠎ᠡ ᠵᠤᠷᠢᠭ ᠲᠠᠢ᠂ ᠡᠷᠠᠮᠡᠭᠡᠢ ᠳᠤᠷᠪᠢᠯᠢᠭ ᠬᠦᠮᠦᠨ ᠢ ᠪᠤᠯ ︽ᠶᠠᠰᠤ ᠬᠠᠳᠠᠭᠤ ᠬᠦᠮᠦᠨ︾ ᠭᠡᠵᠦ᠂ ᠵᠤᠷᠢᠭ ᠰᠦᠰᠦ ᠦᠭᠡᠢ᠂ ᠬᠦᠮᠦᠨ ᠴᠢᠨᠠᠷ ᠪᠠᠷᠤᠭᠳᠠᠢ ᠬᠦᠮᠦᠨ ᠢ ᠪᠤᠯ ︽ᠶᠠᠰᠦ ᠮᠠᠭᠤᠳᠤ ᠶᠠᠪᠤᠨ ᠬᠠᠳᠠᠨ᠎ᠠ︾ ᠭᠡᠳᠡᠭ᠃ ᠡᠳ᠋ ᠳᠠᠸᠠᠷ᠂ ᠪᠤᠳᠠᠰ ᠤᠨ ᠰᠠᠶᠢᠨ ᠮᠠᠭᠤ ᠶᠢ ᠳᠤᠳᠤᠯᠠᠬᠤ ᠳᠤ ︽ᠶᠠᠰᠦ ᠴᠢᠨᠠᠷ ᠢ ᠨᠢ ᠦᠵᠠ︾ ᠭᠡᠳᠡᠭ᠃ ᠮᠠᠯ ᠳᠤ ᠬᠦᠢᠴᠠᠳ ᠳᠠᠷᠭᠤ ᠠᠪᠤᠭᠤᠯᠬᠤ ᠶᠢ ᠪᠤᠯ ︽ᠶᠠᠰᠤᠨ ᠳᠠᠷᠭᠤ ᠠᠪᠤᠭᠤᠯᠬᠤ︾ ᠭᠡᠵᠦ ︽ᠮᠢᠬᠠᠨ ᠤ ᠬᠠᠭᠠᠨ ᠨᠢᠳᠦ᠂ ᠶᠠᠰᠤᠨ ᠤ ᠬᠠᠭᠠᠨ ᠰᠢᠳᠦ︾ ᠭᠡᠮᠡᠨ ᠦᠵᠠᠵᠦ ᠮᠠᠯ ᠤᠨ ᠶᠠᠰᠤ ᠴᠢᠨᠠᠷ᠂ ᠨᠠᠰᠤ ᠵᠢᠯ ᠢ ᠳᠤᠳᠤᠯᠠᠬᠤ ᠳᠤ᠂ ᠰᠢᠳᠦ ᠶᠢ ᠨᠢ ᠰᠢᠨᠵᠢᠵᠦ ᠳᠤᠳᠤᠯᠠᠳᠠᠭ᠃ ᠰᠢᠳᠦ ᠪᠠᠷ ᠨᠢ ᠭᠡᠳᠦᠨ ᠨᠠᠰᠤ ᠲᠠᠢ ᠮᠠᠯ ᠪᠤᠶᠤ ᠬᠢᠷᠢ ᠵᠡᠷᠭᠡ ᠶᠢᠨ ᠴᠢᠨᠠᠷ ᠶᠠᠰᠤ ᠲᠠᠢ ᠮᠠᠯ ᠭᠡᠰᠡᠨ ᠢ ᠨᠢ ᠭᠡᠯᠡᠵᠦ ᠭᠠᠷᠭᠠᠳᠠᠭ᠃ ᠤᠩᠭᠠᠰᠤ ᠨᠤᠤᠰᠤ ᠡᠯᠳᠠᠵᠦ ᠢᠰᠡᠭᠡᠢ ᠬᠢᠬᠦ ᠳᠤ ᠪᠠᠨ ︽ᠶᠠᠰᠦ ᠠᠴᠠ ᠬᠠᠳᠠᠭᠤ᠂ ᠴᠠᠰᠤᠨ ᠠᠴᠠ ᠴᠠᠭᠠᠨ ᠪᠤᠯᠳᠤᠭᠠᠢ︾ ᠭᠡᠮᠡᠨ ᠢᠷᠦᠭᠡᠵᠦ᠂ ᠶᠠᠮᠠᠷ ᠨᠢᠭᠡᠨ ᠶᠠᠪᠤᠳᠠᠯ ᠤᠴᠢᠷ ᠢ ᠪᠦᠳᠦᠭᠡᠭᠦ ᠳᠤ ︽ᠶᠠᠰᠦ ᠶᠢ ᠨᠢ ᠪᠠᠷᠢᠵᠦ ᠶᠤᠰᠤ ᠶᠢ ᠨᠢ ᠳᠠᠭᠠᠬᠤ︾᠂ ︽ᠶᠠᠰᠤᠨ ᠳᠤ ᠨᠢ ᠮᠦᠷᠬᠦᠵᠦ ᠶᠤᠰᠤᠨ ᠳᠤ ᠨᠢ ᠶᠤᠤᠯᠠᠬᠤ︾᠂ ︽ᠶᠠᠰᠤᠨ ᠳᠤ ᠵᠠᠪᠰᠠᠷ ᠦᠭᠡᠢ᠂ ᠶᠠᠪᠤᠳᠠᠯ ᠳᠤ ᠶᠠᠭᠠᠷᠠᠯ ᠦᠭᠡᠢ︾ ᠭᠡᠭᠦ ᠮᠠᠳᠤᠴᠢᠯᠠᠨ ᠵᠦᠢᠷᠯᠠᠵᠦ ᠳᠦᠷᠰᠦᠯᠠᠵᠦ ᠵᠤᠷᠢᠵᠦ ᠵᠢᠳᠬᠦᠵᠦ ᠪᠦᠳᠦᠭᠡᠵᠦ ᠬᠦᠢᠴᠠᠳᠭᠡᠳᠡᠭ᠃ ᠪᠠᠰᠠ ᠡᠴᠢᠭᠡ ᠶᠢᠨ ᠳᠠᠯ᠎ᠠ ᠶᠢᠨ ᠶᠢᠰᠤᠨ ᠦᠶ᠎ᠠ ︵ᠳᠡᠬᠡᠭᠰᠢ ᠶᠢᠰᠤᠨ ᠦᠶ᠎ᠠ︶ ᠶᠢ ᠪᠤᠯ ᠶᠠᠰᠤᠨ ᠳᠦᠷᠦᠯ ᠭᠡᠮᠡᠨ ᠳᠤᠭᠠᠯᠠᠵᠦ᠂ ᠳᠠᠷᠠ ᠦᠶ᠎ᠠ ︵ᠳᠡᠭᠡᠭᠰᠢ ᠶᠢᠰᠦᠨ ᠦᠶ᠎ᠠ︶ ᠦᠩᠭᠡᠷᠡᠭᠦ ᠳᠤ ᠰᠠᠶ᠋ᠢ ︽ᠶᠠᠰᠤ ᠴᠠᠶᠢᠷᠠᠯ᠎ᠠ᠂ ᠦᠶ᠎ᠠ ᠰᠤᠨᠤᠯ᠎ᠠ᠂ ᠦᠶ᠎ᠠ ᠮᠤᠯᠳᠤᠷᠤᠯ᠎ᠠ ︵ᠰᠠᠳᠤᠨ ᠳᠦᠷᠦᠯ ᠤᠨ ᠬᠠᠷᠢᠴᠠᠭ᠎ᠠ ᠭᠡᠯᠬᠢᠶ᠎ᠡ ᠬᠤᠯᠠᠳᠤᠯ᠎ᠠ ᠭᠡᠰᠡᠨ ᠦᠭᠡ︶︾ ᠭᠡᠵᠦ ᠭᠡᠯᠡᠳᠡᠭ᠃ ᠶᠠᠰᠤ ᠨᠢ ᠮᠤᠩᠭᠤᠯᠴᠤᠳ ᠤᠨ ᠠᠮᠢᠳᠤᠷᠠᠯ ᠤᠨᠳᠤᠷᠤᠯᠭ᠎ᠠ᠂ ᠨᠠᠭᠦᠳᠡᠯ ᠪᠠᠭᠤᠳᠠᠯ᠂ ᠡᠳ᠋ᠯᠠᠯ ᠭᠡᠷᠡᠭᠰᠡᠯ᠂ ᠵᠠᠰᠠᠯ ᠵᠢᠮᠰᠡᠭ᠂ ᠰᠤᠶᠤᠯ ᠢᠷᠭᠡᠨᠰᠢᠯ᠂ ᠵᠠᠩ ᠦᠢᠯᠠ ᠵᠡᠷᠭᠡ ᠲᠠᠢ ᠰᠠᠯᠤᠰᠢ ᠦᠭᠡᠢ ᠬᠤᠯᠪᠤᠭ᠎ᠠ ᠲᠠᠢ ᠪᠠᠶᠢᠳᠠᠭ᠃ ᠶᠠᠰᠤ ᠶᠢ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠳᠤ ᠭᠡᠷᠡᠭᠯᠡᠳᠡᠭ᠃ ᠬᠤᠨᠢ᠂ ᠢᠮᠠᠭ᠎ᠠ᠂ ᠦᠭᠡᠷ ᠤᠨ ᠡᠪᠡᠷ ᠤᠨ ᠳᠤᠬᠤ ᠪᠤᠶᠤ ᠳᠠᠭᠠᠷᠢᠳᠠᠰᠤ ᠪᠠᠷ ᠮᠤᠷᠢᠨ ᠤ ᠴᠢᠳᠦᠷ᠂ ᠨᠤᠭᠳᠤ᠂ ᠬᠠᠵᠠᠭᠠᠷ ᠬᠢᠬᠦ ᠪᠤᠶᠤ ᠦᠭᠡᠷ ᠤᠨ ᠡᠪᠡᠷ ᠢᠶᠠᠷ ᠤᠭᠵᠢ᠂ ᠡᠪᠠᠷ ᠬᠤᠨᠳᠠᠭ᠎ᠠ ᠬᠢᠳᠡᠭ᠃ ᠮᠠᠯ ᠤᠨ ᠡᠪᠡᠷ ᠳᠤᠯᠤᠭᠠᠢ ᠶᠢᠨ ᠶᠠᠰᠦ᠂ ᠳᠠᠯᠤᠨ ᠤ ᠶᠠᠰᠤ ᠵᠡᠷᠭᠡ ᠶᠢ ᠵᠠᠰᠠᠵᠦ ᠭᠤᠶᠤᠯᠠᠭᠠᠳ ᠭᠤᠶᠤᠯᠠᠯ ᠵᠠᠰᠠᠯ ᠤᠨ ᠵᠦᠢᠯᠠᠰ ᠪᠤᠯᠭᠠᠨ ᠭᠡᠷ ᠲᠤ ᠪᠠᠨ ᠡᠯᠬᠦᠳᠡᠭ᠃ ᠳᠤᠭᠯᠠᠭᠠᠮ ᠳᠤ ᠪᠠᠰᠠ ᠭᠡᠷᠡᠭᠯᠡᠳᠡᠭ᠃ ᠬᠤᠨᠢ ᠢᠮᠠᠭᠠᠨ ᠤ ᠱᠠᠭ᠎ᠠ ᠶᠢ ᠴᠤᠭᠯᠠᠭᠤᠯᠵᠦ ᠱᠠᠭᠠᠴᠠᠬᠤ᠂ ᠨᠢᠰᠡᠯᠴᠠᠭᠠᠬᠤ᠂ ᠰᠠᠶ᠋ᠢᠩ ᠤᠷᠬᠢᠬᠤ ᠂ ᠬᠠᠷᠪᠤᠬᠤ᠂ ︵ᠪᠤᠭᠤ ᠶᠢᠨ ᠵᠢᠷᠬᠢᠭᠡ ᠳᠠᠯᠪᠢᠬᠤ︶ ᠭᠡᠷ ᠪᠠᠷᠢᠬᠤ᠂ ᠳᠡᠷᠭᠡ ᠨᠠᠶᠢᠷᠠᠬᠤ᠂ ᠪᠠᠷᠢᠯᠴᠠᠭ᠎ᠠ ᠪᠠᠷᠢᠬᠤ ︵ᠳᠤᠭ᠎ᠠ ᠳᠠᠭᠠᠬᠤ︶ ᠮᠤᠷᠢ ᠤᠷᠤᠯᠳᠤᠬᠤ ᠮᠠᠳᠤ ᠨᠠᠭᠠᠳᠤᠮ ᠨᠠᠭᠠᠳᠳᠠᠭ᠃ ᠮᠠᠯ ᠤᠨ ᠰᠠᠭᠡᠷ ︵ᠭᠤᠤᠯ ᠤᠨ ᠦᠨᠳᠦᠷ︶ ᠪᠤᠶᠤ ᠪᠤᠭᠳᠤᠭᠠᠰᠤ᠂ ᠱᠠᠭᠠᠨᠳᠤ ᠴᠦᠮᠦᠭᠡ ᠶᠢ ᠰᠢᠭᠠᠯᠭᠠᠵᠦ ᠵᠠᠯᠠᠭᠤ ᠢᠳᠠᠷᠴᠤᠤᠯ ᠤᠨ ᠭᠠᠷ ᠤᠨ ᠬᠦᠴᠦ ᠪᠤᠯᠤᠨ ᠡᠪ ᠳᠠᠮ ᠢ ᠰᠢᠯᠭᠠᠨ ᠦᠵᠠᠳᠡᠭ᠃ ᠪᠠᠰᠠ ᠰᠢᠨ᠎ᠠ ᠭᠦᠷᠭᠡᠨ ᠢᠶᠠᠷ ᠬᠦᠵᠦᠬᠦᠦ ᠮᠤᠰᠬᠢᠭᠤᠯᠵᠦ ᠬᠢᠷᠢ ᠵᠡᠷᠭᠡ ᠴᠢᠳᠠᠯ ᠳᠠᠷ ᠲᠠᠢ ᠶᠢ ᠨᠢ ᠰᠢᠯᠭᠠᠨ ᠦᠵᠠᠳᠡᠭ᠃ ᠶᠠᠰᠤ ᠶᠢ ᠡᠮᠴᠢᠯᠡᠭᠡ ᠰᠤᠪᠢᠯᠠᠭ᠎ᠠ ᠳᠤ ᠭᠡᠷᠡᠭᠯᠡᠳᠡᠭ᠃ ᠳᠠᠮᠢᠷ ᠳᠡᠩᠭᠡᠭᠡ ᠠᠨᠠᠢ ᠬᠦᠮᠦᠨ ᠪᠤᠶᠤ ᠡᠪᠡᠳᠴᠢᠨ ᠬᠠᠭᠤᠴᠢᠨ ᠲᠠᠢ ᠬᠦᠮᠦᠨ ᠮᠢᠬ᠎ᠠ ᠶᠢ ᠨᠢ ᠰᠠᠶᠢᠳᠦᠷ ᠮᠦᠯᠵᠢᠭᠰᠡᠨ ᠶᠠᠰᠤ ᠶᠢ ᠰᠠᠶᠢᠳᠦᠷ ᠪᠤᠴᠠᠯᠭᠠᠵᠦ ᠱᠦᠯᠦ ᠶᠢ ᠨᠢ ᠤᠤᠭᠤᠪᠠᠯ ᠳᠠᠮᠢᠷ ᠳᠡᠩᠭᠡᠭᠡ ᠤᠷᠤᠬᠤ ᠪᠤᠶᠤ ᠡᠷᠡᠭᠦᠯᠵᠢᠬᠦ ᠳᠤ ᠳᠤᠰᠠᠳᠠᠢ ᠭᠡᠵᠦ ᠶᠠᠰᠤᠨ ᠱᠦᠯᠦ ᠪᠤᠴᠠᠯᠭᠠᠵᠦ ᠤᠤᠭᠤᠯᠭᠠᠳᠠᠭ᠃ ᠰᠢᠳᠦᠯᠠᠵᠦ ᠬᠦᠢᠴᠡᠭᠰᠡᠨ ᠬᠡᠤᠬᠡᠳ ᠤᠨ ᠰᠢᠳᠦ ᠶᠢ ᠰᠠᠭᠤᠯᠭᠠᠨ᠎ᠠ᠂ ᠪᠤᠯᠪᠠᠰᠤᠷᠠᠭᠤᠯᠤᠨ᠎ᠠ᠂ ᠴᠢᠩᠭᠠᠷᠠᠭᠤᠯᠤᠨ᠎ᠠ ᠭᠡᠵᠦ ᠳᠤᠶᠢᠭ ᠪᠤᠶᠤ ᠪᠤᠷᠪᠢ ᠶᠢᠨ ᠶᠠᠰᠤ ᠶᠢ ᠮᠦᠯᠵᠢᠭᠦᠯᠳᠡᠭ᠃ ᠬᠠᠪᠤᠷ ᠤᠨ ᠭᠠᠴᠢᠭ ᠴᠠᠭ ᠲᠤ ᠶᠠᠳᠠᠷᠠᠵᠦ ᠳᠦᠢᠯᠳᠠᠭᠰᠠᠨ ᠮᠠᠯ ᠳᠤ ᠳᠠᠮᠢᠷ ᠬᠦᠴᠦ ᠶᠢ ᠨᠢ ᠰᠠᠯᠬᠦᠨ᠎ᠠ ᠭᠡᠵᠦ ᠶᠠᠰᠤᠨ ᠱᠦᠯᠦ ᠴᠢᠳᠬᠤᠳᠠᠭ ᠪᠦᠭᠡᠳ ᠶᠠᠰᠤ ᠶᠢ ᠰᠢᠳᠠᠭᠠᠨ ᠦᠨᠦᠷᠯᠡᠭᠦᠯᠳᠡᠭ᠃ ᠵᠠᠷᠢᠮ ᠳᠤ ᠪᠠᠨ ᠶᠠᠰᠤ ᠶᠢ ᠭᠡᠮᠭᠡᠴᠠᠨ ᠭᠡᠮᠭᠡᠳᠡᠭ ᠢ ᠨᠢ ᠢᠳᠡᠭᠦᠯᠳᠡᠭ᠃ ᠶᠠᠰᠤ ᠶᠢ ᠳᠤᠮ ᠰᠢᠪᠰᠢᠯᠭᠡ ᠳᠤ ᠭᠡᠷᠡᠭᠯᠡᠳᠡᠭ᠃ ᠠᠯᠢᠪᠠ ᠠᠮᠢᠳᠠᠨ ᠤ ᠠᠮᠢᠨ ᠰᠦᠨᠠᠰᠦ ᠨᠢ ᠠᠮᠠᠨ ᠬᠦᠵᠦᠬᠦᠦ ᠳᠤ ᠪᠠᠨ ᠪᠠᠶᠢᠳᠠᠭ ᠭᠡᠮᠡᠨ ᠦᠵᠠᠵᠦ᠂ ᠠᠮᠠᠨ ᠬᠦᠵᠦᠬᠦᠦ ᠶᠢ ᠴᠢᠨᠠᠵᠦ ᠢᠳᠠᠴᠢᠭᠡᠭᠡᠳ ᠦᠭᠡᠭᠦ ᠳᠤᠰᠤ ᠪᠠᠷ ᠴᠢᠮᠠᠨ ᠭᠠᠯ ᠳᠤ ᠪᠠᠨ ᠡᠷᠬᠦᠨ ᠰᠢᠳᠠᠭᠠᠵᠦ ᠦᠨᠠᠰᠦ ᠶᠢ ᠨᠢ ᠴᠠᠪᠠᠷ ᠰᠠᠶᠢᠬᠠᠨ ᠵᠦᠭ ︵ᠭᠠᠵᠠᠷ︶ ᠲᠤ ᠰᠠᠴᠤᠳᠠᠭ᠃ ᠶᠠᠰᠤ ᠶᠢ ᠳᠠᠯᠠᠯᠭ᠎ᠠ ᠳᠠᠬᠢᠯᠭ᠎ᠠ ᠳᠤ ᠭᠡᠷᠡᠭᠯᠡᠳᠡᠭ᠃ ᠭᠤᠤᠯ ᠨᠢ ᠠᠳᠤᠭᠤ᠂ ᠬᠤᠨᠢ᠂ ᠦᠭᠡᠷ ᠤᠨ ᠳᠤᠯᠤᠭᠠᠢ ᠶᠢᠨ ᠶᠠᠰᠤ ᠪᠤᠶᠤ ᠪᠤᠭ ᠮᠠᠯ ᠤᠨ ᠱᠠᠭᠠᠨᠳᠤ ᠶᠢ ᠰᠢᠳᠦᠵᠦ ᠳᠠᠬᠢᠳᠠᠭ᠃ ᠮᠤᠩᠭᠤᠯᠴᠤᠳ ᠤᠨᠤᠵᠦ ᠪᠠᠶᠢᠭ᠎ᠠ ᠮᠤᠷᠢ ᠨᠢ ᠨᠠᠰᠤ ᠦᠳᠠᠯᠵᠦ ᠦᠬᠦᠪᠠᠯ ︽ᠰᠠᠶᠢᠨ ᠮᠤᠷᠢ ᠶᠢᠨ ᠵᠠᠶᠠᠭ᠎ᠠ ᠪᠤᠤ ᠳᠠᠰᠤᠷᠠᠭ︾ ᠭᠡᠮᠡᠨ ᠳᠤᠯᠤᠭᠠᠢ ᠶᠢᠨ ᠶᠠᠰᠤ ᠶᠢ ᠨᠢ ᠬᠠᠳᠠᠭ ᠢᠶᠠᠷ ᠤᠷᠢᠶᠠᠵᠦ ᠬᠠᠳᠠᠭᠠᠯᠠᠬᠤ ᠪᠤᠶᠤ ᠬᠤᠮᠤᠯ ᠪᠤᠯᠤᠨ ᠦᠭᠡᠭᠦᠨ ᠴᠢᠯᠠᠭᠤ ᠪᠠᠷ ᠢᠶᠠᠨ ᠴᠢᠮᠠᠵᠦ ︽ᠡᠨᠡ ᠰᠠᠶᠢᠨ ᠮᠤᠷᠢᠨ ᠳᠤ ᠮᠢᠨᠢ ᠦᠯᠵᠠᠢ ᠬᠤᠳᠤᠭ ᠦᠨᠢᠳᠠ ᠤᠷᠤᠰᠢᠬᠤ ᠪᠤᠯᠳᠤᠭᠠᠢ︾ ᠭᠡᠮᠡᠨ ᠢᠷᠦᠭᠡᠨ ᠠᠳᠢᠰᠯᠠᠭᠠᠳ ᠦᠨᠳᠦᠷ ᠠᠭᠤᠯᠠ ᠶᠢᠨ ᠤᠷᠤᠢ ᠳᠤ ᠠᠪᠠᠴᠢᠵᠦ ᠤᠷᠤᠩᠨᠠᠭᠤᠯᠵᠦ ᠳᠠᠯᠪᠢᠳᠠᠭ᠃
     ᠶᠠᠰᠤ ᠶᠢ ᠮᠡᠷᠭᠡ ᠳᠦᠯᠭᠡ ᠳᠤ ᠭᠡᠷᠡᠭᠯᠡᠳᠡᠭ ᠃ ᠮᠠᠯ ᠤᠨ ᠳᠠᠯᠤ ᠪᠤᠶᠤ ᠱᠠᠭᠠᠨᠳᠤ ᠪᠠᠷ ᠮᠡᠷᠭᠡ ᠳᠦᠯᠭᠡ ᠦᠵᠡᠳᠡᠭ᠃ ᠱᠠᠭᠠᠨᠳᠤ ᠠᠴᠠ ᠱᠠᠭ᠎ᠠ ᠶᠢ ᠨᠢ ᠰᠠᠯᠭᠠᠵᠦ ᠠᠪᠤᠭᠠᠳ ᠭᠤᠷᠪᠠ ᠤᠳᠠᠭ᠎ᠠ ᠤᠷᠬᠢᠵᠦ ︽ᠮᠤᠷᠢ︾ ᠳᠤᠰᠬᠠᠵᠦ ᠦᠪᠠᠷ ᠤᠨ ᠪᠠᠶ᠎ᠠ ᠪᠤᠶᠤ ᠭᠡᠨ ᠨᠢᠭᠡᠨ ᠤ ᠪᠠᠨ ᠠᠵᠠ ᠲᠠᠢ ᠭᠡᠶᠢᠮᠤᠷᠢ ᠲᠠᠢ ᠶᠠᠪᠤᠵᠦ ᠪᠠᠶᠢᠬᠤ ᠡᠰᠠᠬᠦ ᠶᠢ ᠰᠢᠨᠵᠢᠳᠡᠭ᠃ ᠱᠠᠭ᠎ᠠ ᠶᠢ ᠭᠤᠷᠪᠠ ᠤᠳᠠᠭ᠎ᠠ ᠤᠷᠬᠢᠭᠠᠳ ︽ᠮᠤᠷᠢ︾ ᠪᠠᠭᠤᠪᠠᠯ ᠡᠨᠡ ᠬᠦᠮᠦᠨ ᠢ ︽ᠶᠡᠭᠡᠳᠡ ᠠᠵᠠ ᠲᠠᠢ ᠬᠡᠶᠢᠮᠤᠷᠢ ᠲᠠᠢ ᠬᠦᠮᠦᠨ᠂ ᠡᠬᠦᠨ ᠠᠴᠠ ᠬᠤᠶᠢᠰᠢ ᠠᠵᠠ ᠲᠠᠢ ᠭᠡᠶᠢᠮᠤᠷᠢ ᠲᠠᠢ ᠶᠠᠪᠤᠨ᠎ᠠ︾ ᠭᠡᠵᠦ ᠪᠡᠯᠭᠡᠰᠢᠶᠠᠨ ᠳᠠᠭᠠᠰᠢᠶᠠᠳᠠᠭ᠃ ᠤᠯᠠᠩᠬᠢ ᠮᠤᠩᠭᠤᠯ ᠭᠠᠵᠠᠷ ᠬᠤᠨᠢᠨ ᠤ ᠳᠠᠯᠤᠨ ᠶᠠᠰᠤ ᠶᠢ ᠰᠢᠨᠵᠢᠪᠠᠯ ᠡᠵᠡᠨ ᠬᠦᠮᠦᠨ ᠤ ᠭᠡᠶᠢᠮᠤᠷᠢ ᠰᠦᠯᠳᠠ᠂ ᠡᠳ᠋ ᠬᠦᠷᠦᠩᠭᠡ ᠂ ᠠᠭᠠᠯᠢ ᠵᠠᠩ᠂ ᠠᠳᠤᠭᠤ ᠮᠠᠯ᠂ ᠠᠯᠢᠪᠠ ᠦᠢᠯᠠ ᠭᠡᠷᠡᠭ ᠢ ᠪᠦᠷᠢᠨ ᠮᠠᠳᠠᠵᠦ ᠪᠤᠯᠤᠨ᠎ᠠ ᠭᠡᠮᠡᠨ ᠳᠠᠯᠤᠨ ᠶᠠᠰᠤ ᠶᠢ ᠮᠠᠷᠭᠡ ᠳᠦᠯᠭᠡ ᠳᠤ ᠤᠯᠠᠨ ᠭᠡᠷᠡᠭᠯᠠᠳᠡᠭ᠃ ᠶᠠᠰᠤ ᠶᠢ ᠵᠠᠩ ᠠᠭᠠᠯᠢ ᠳᠤ ᠭᠡᠷᠡᠭᠯᠠᠳᠡᠭ᠃ ᠰᠢᠨ᠎ᠠ ᠭᠡᠷ ᠪᠠᠷᠢᠬᠤ᠂ ᠨᠠᠰᠦ ᠨᠠᠮᠠᠬᠦ᠂ ᠬᠡᠤᠬᠡᠳ ᠳᠦᠷᠦᠬᠦ᠂ ᠬᠦᠮᠦᠨ ᠨᠠᠰᠤ ᠪᠠᠷᠠᠬᠤ ᠵᠡᠷᠭᠡ ᠳᠤ ᠴᠦᠮ ᠱᠠᠭᠠᠨᠳᠤ ᠴᠢᠮᠦᠭᠡ ᠶᠢᠨ ᠶᠠᠰᠤ ᠶᠢ ᠭᠡᠷᠡᠭᠯᠡᠳᠡᠭ᠃ ᠡᠩᠭᠦᠷᠡᠢ ᠨᠢᠷᠠᠢ ᠬᠡᠤᠬᠡᠳ ᠲᠤ ᠡᠪᠡᠳᠴᠢᠨ ᠡᠮᠭᠡᠭ ᠪᠢᠳᠡᠭᠡᠢ ᠳᠤᠰᠤᠭ ᠭᠡᠮᠡᠨ ᠦᠯᠦᠭᠡᠢ ᠶᠢᠨ ᠪᠠᠷᠠᠭᠤᠨ ᠭᠠᠷ ᠳᠠᠯ᠎ᠠ ᠳᠤ ᠨᠢ ᠱᠠᠭᠠᠨᠳᠤ ᠴᠢᠮᠦᠭᠡ ᠬᠠᠳᠠᠵᠦ ᠤᠶᠠᠳᠠᠭ ᠵᠠᠩᠰᠢᠯ ᠪᠤᠢ ᠪᠦᠭᠡᠳ ᠰᠠᠶ᠋ᠢ ᠭᠠᠷᠴᠤ ᠪᠠᠶᠢᠭ᠎ᠠ ᠬᠡᠤᠬᠡᠳ ᠲᠤ ᠱᠠᠭ᠎ᠠ ᠶᠢ ᠨᠦᠭᠡᠯᠡᠨ ᠤᠭᠤᠰᠤᠷ ᠬᠠᠳᠠᠵᠦ ᠵᠡᠭᠦᠯᠭᠡᠳᠡᠭ ᠵᠠᠩᠰᠢᠯ ᠴᠤ ᠪᠤᠢ᠃ 
ᠢᠷᠡᠯᠲᠡ᠄ ᠤᠷᠳᠤᠰ ᠮᠤᠩᠭᠤᠯ ᠰᠦᠯᠵᠢᠶ᠎ᠠ